Unha forma de practicar o ecoloxismo é mediante a compra de produtos a granel.  Ademais de abaratar custos, podes prescindir do uso de envases innecesarios e  mercar só o que precisas. Contribuímos desta forma a promover a cultura do "zero waste” e a minimizar os residuos. 
 

Por outra banda, en Árbore sempre ofrecemos envases ecolóxicos e biodegradables. Deste  xeito tratamos de asegurarnos de que o noso planeta non sufra as consecuencias  dos nosos intercambios comerciais.

Coa nosa actividade económica procuramos coidar as relacións con todas as nosas provedoras; as máis próximas e tamén as que quedan máis lonxe, normalmente en países do Sur Global.

Buscamos manter o delicado equilibrio entre uns prezos o máis accesibles posibles para as nosas socias e clientas, e unhas condicións laborais e prezos dignos para todas as persoas que participan na produción dos bens que ofrecemos na tenda.

Cremos nunha forma diferente de economía, na que as empresas se xestionan democraticamente, antepoñan os dereitos das persoas, e buscan o impacto social positivo e o coidado do medio. 

Por todo isto, somos socias de REAS (Rede de Economía Alternativa e Solidaria) e compartimos e nos rexemos pola súa Carta de Principios.

No corazón da nosa cooperativa está o compromiso co consumo consciente. Proporcionamos acceso a alimentos ecolóxicos, saudables e respectuosos co medio ambiente. 

Facémolo de forma transparente, para que ti, socia/clienta, poidas tomar decisións informadas e para que entre todas poidamos consumir de forma responsable coas persoas (tamén as xeracións futuras) e co planeta.